Tingkagol karon sa Police Station 2 General Santos City Police Office ang usa ka 41-anyos nga habal-habal driver human kini nasikop sa gikasang buy-bust operation sa kapulisan bandang ala 1:33 sa kaadlawon, Mayo 22, 2026, subay sa National Highway, kilid sa CITI Hardware, Barangay Apopong General Santos City.
Giila sa kapulisan ang suspetsado nga si Alyas “DONDON,” lumad nga taga Malisbong, Palimbang, Sultan Kudarat, apan temporaryong nagpuyo sa Purok Olarte, Barangay Labangal, General Santos City.
Malampusong nasikop ang suspek human kini nagbaligya og usa ka sachet sa gikatahapang shabu ngadto sa poseur-buyer gamit ang 500-peso buy-bust money.
Gawas sa sachet nga napalit gikan sa suspek, narekober pa sa mga operatiba gikan sa posisyon sa suspek ang laing usa ka dako o large sachet sa gituohang shabu kauban ang gigamit nga 500-peso issip marked money.
Nasayran gikan sa Police Station 2 nga pipila ka adlaw na nilang gipanid-an ang mga lihok sa suspek human makadawat og report kalabot sa kalambigitan niini sa ilegal nga negosyo.
Sa kasamtangan, giandam na sa kapulisan ang pagpasaka og kasong pagsupak sa Republic Act 9165 kon Comprehensive Dangerous Drugs Act of 2002 batok sa suspetsado.
Photo Courtesy: Prime Video
