Gipamatud-an ni Cagayan de Oro boxing pride ug Tokyo Olympics silver medalist Carlo Paalam nga nagpabilin pa ang katakus ug talagsaong abilidad niini sa elite boxing circle sa kalibotan.
Kini human malipayong gitaho ni RP team national boxing coach ug CdeO amateur boxing team head coach Elmer Pamisa nga miabante na sa championship round si Paalam sa nagpadayong Eindhoven Box Cup 2026 didto sa nasud sa The Netherlands.
Sumala ni coach Pamisa giparot ni Paalam ang pambato sa nasud sa France nga si Binnama Billal atol sa ilang kulbahinam nga semifinal bout sa elite 55 kgs category pinaagi sa iskor nga 4-1.
Dili basta-basta ang kaatbang ni Paalam nga si Billal tungod kay usa kini ka silver medalist sa Paris Olympics, pasigarbo ni coach Pamisa sa kalampusan nga nakab-ot sa Kagayanong boksidor.
Miabante si Paalam sa semifinals human gidominar ang boksidor sa Germany nga si Justin Sahin sa unanimous decision, 5-0, sa ilang dula sa quarterfinals.
Tungod sa kalampusan ni Paalam, sigurado na kini nga makaangkon og silver medal sa international boxing competition nga gisalmotan sa mga banggiitang boksidor gikan sa lain-laing nasud sa kalibotan.
Photo courtesy: Cagayan de Oro Information Office
