Posibleng mosaka na usab ang presyo sa mga produktong petrolyo sunod semana tungod sa nagpadayong problema sa suplay tungod sa tensiyon sa Middle East.
Base sa mga forecast sa industriya sa lana gamit ang resulta sa Mean of Platts Singapore (MOPS) ug foreign exchange trading sa niaging upat ka adlaw, posibleng motaas ang presyo sa diesel ug gasolina.
Ang diesel gipaabot nga mosaka og P1.00 ngadto sa P1.30 matag litro samtang ang gasolina posibleng mosaka sa P1.20 ngadto sa P1.50 matag litro.
Matod sa tinubdan sa industriya sa lana, padayon nga apektado ang diesel sa kataas sa presyo sa krudo ug sa wala pa masulbad nga problema sa suplay sa lana sa kalibotanong merkado.
Samtang, ang presyo sa gasolina giingon usab nga magpabilin nga taas tungod sa limitado nga global nga suplay ug pagtaas sa panginahanglan, labi na sa Estados Unidos sa pagsugod sa peak season sa ting-init.
Bisan og adunay gamay nga pagkunhod sa presyo sa krudo karong bag-o tungod sa positibo nga panaghisgot sa kalinaw tali sa Estados Unidos ug Iran, ang tinubdan miingon nga ang mga lihok sa presyo nagpabilin nga dili mausab tungod kay dili pa sigurado kung kanus-a matapos ang tensyon sa Middle East.
Ang mga kompaniya sa lana kasagarang magpahibalo sa ilang price adjustments matag Lunes ug ipatuman kini sa Martes.
Photo Courtesy: Auto car Professional
