Giila karon nga adunay pinakataas nga outdoor escalator system sa kalibutan ang Wushan Goddess Escalator sa Chongqing City, China.
Nahimutang ang maong imprastraktura sa Wushan County ug gilangkuban sa 21 ka escalators, walo ka elevators, upat ka moving walkways, duha ka pedestrian bridges, ug duha ka overpasses.
Sumala sa mga taho, gitukod ang sistema aron mapadali ang pagbiyahe tali sa upper ug lower sections sa Gaotang area sa Wushan County. Gikan sa kapin usa ka oras nga biyahe, mahimo na lang kini nga mga 20 minutos pinaagi sa escalator system.
Ang gilay-on sa taas ug ubos nga bahin sa lugar mokabat og 242 metros, nga giingong katumbas sa gitas-on sa usa ka 80 ka andana nga building. Ang kinatibuk-ang gilapdon sa outdoor escalator system mokabat usab og 905 metros.
Nisugod ang paid trial operations sa Wushan Goddess Escalator niadtong Pebrero 17 ning tuiga. Ang matag pasahero mobayad og tulo ka yuan matag sakay.
Gilauman nga makatabang ang proyekto sa pagpaayo sa transportasyon ug pagpalambo sa accessibility alang sa mga residente ug bisita sa Chongqing City.
Photo Courtesy: Future Publishing via Getty Images
