Moabot sa gibanabana nga 13,000 ka mga student-athletes ug mga opisyal gikan sa 18 ka rehiyon ang nagtapok alang sa usa ka semana nga kompetisyon nga nagdala sa temang “Palaro Tu AgSur 2026”atol sa opisyal nga pagsugod sa makasaysayanong ika-66 nga edisyon sa Palarong Pambansa didto sa Datu Lipus Makapandong Sports Complex kagabii Mayo 24, 2026.
Kini ang labing unang higayon sa kasaysayan nga ang probinsya sa Agusan del Sur ug ang tibuok Caraga Region, nagtinabangay isip host niining labing dako nga tinuig nga grassroots sporting event sa nasod.
Sa maong higayon, naghatag sa iyang mensahe si Presidente Ferdinand “Bongbong” Marcos Jr. pinaagi sa usa ka video message diin iyang opisyal nga gideklara ang pag-abli sa dula ug gipahibalo ang dugang pinansyal nga incentives alang niadtong makakuha og medalya.
Gipangunahan ang maong okasyon sa aktuwal nga seremonya ni Department of Education (DepEd) Secretary Sonny Angara, Special Assistant to the President Antonio Lagdameo Jr., ug Agusan del Sur Governor Santiago Cane Jr.
Nahimong highlight sa kagabhion, ang talagsaong drone show ug madasigong pyromusical display dungan sa pagdagkot sa ceremonial cauldron nga magsilbing simbolo sa panaghiusa sa maong kalihukan nga molungtad hangtod sa Mayo 31
Photo Courtesy: DepEd Philippines/PNA
