Nakatala ang Department of Health (DOH) og kapin 4,600 ka bag-ong kaso sa human immunodeficiency virus (HIV) sa nasud sulod lamang sa unang tulo ka bulan sa tuig 2026.
Base sa pinakabag-ong datos sa HIV and AIDS Surveillance of the Philippines, adunay 4,633 ka bag-ong HIV cases gikan Enero hangtod Marso karong tuiga. Mas taas kini og siyam ka porsyento kumpara sa susamang panahon niadtong 2025.
Matod sa DOH, sa kinatibuk-ang ihap sa mga bag-ong kaso, mokabat sa 1,104 o 24 porsyento ang naa na sa advanced HIV stage sa dihang na diagnose sila.
Nitala usab sa DOH nga adunay average nga 51 ka kaso matag adlaw niining unang quarter sa tuig. Bisan pa niini, mas ubos kini og 11 porsiyento kumpara sa 57 ka kaso kada adlaw nga naitala niadtong parehas nga panahon sa 2025.
Sa average kada bulan, adunay 1,544 ka kaso nga natala, nga mas ubos usab og siyam ka porsiyento kumpara sa 1,693 monthly cases niadtong miaging tuig.
Pinakataas gihapon ang kaso sa National Capital Region (NCR) nga adunay 989 ka infections. Gisundan kini sa Calabarzon nga adunay 808 ka kaso, Central Luzon nga adunay 551, Soccsksargen nga adunay 277, ug Davao Region nga adunay 263 ka kaso.
Sumala pa sa DOH, kining lima ka rehiyon maoy naglangkob sa 62 porsiyento o 2,888 sa tanang bag-ong HIV cases sa nasud sulod sa maong panahon.
Kadaghanan sa mga bag-ong natakdan kay mga lalaki, diin 4,381 ang lalaki samtang 252 ang babaye. Ang edad sa mga bag-ong kaso gikan sa dos anyos hangtod 77 anyos.
Samtang, base sa National HIV Care Cascade niadtong Marso 2026, gibanabana nga adunay 288,000 ka tawo sa Pilipinas nga nagkinabuhi uban sa HIV. Apan, 55 porsiyento lamang o 157,350 ang kumpirmadong diagnosed pinaagi sa laboratory test.
Photo courtesy:
