Nabungkag ang usa ka “drug den” ug nadakpab ang upat ka indibidwal atol sa gilusad nga buy-bust operation batok sa ilegal nga droga sa Purok 6, Barangay Poblacion, Barobo, Surigao del Sur niadtong Miyerkules sa hapon, Mayo 20, 2026.
Ang operasyon gihimo sa hiniusang pwersa sa Philippine Drug Enforcement Agency o PDEA Surigao del Sur Provincial Office, Regional Intelligence Division, ug Barobo Municipal Police Station alas 4:15 sa hapon.
Lakip sa nadakpan ang usa ka babaye nga giingong tigdumala sa “drug den,” usa usab ka babaye nga giingong trabahante niini, ug duha ka giingong bisita sa maong lugar.
Narekober sa mga otoridad ang kapin unom ka gramo sa gidudahang shabu nga nagkantidad og mga P40,800. Apil niini ang gipalit sa buy-bust operation ug ubang sachet nga gituohang alang sa pagbaligya ug paggamit sa ilegal nga droga.
Nakuha usab sa mga operatiba ang lain-laing drug paraphernalia sama sa improvised sealing materials, disposable lighters, folded aluminum foil, mga cellphone, pitaka, marked money gikan sa buy-bust operation, ug kuwarta nga gituohang konektado sa ilegal nga kalihokan.
Ang upat ka suspek mag atubang karon og kaso tungod sa paglapas sa Sections 5, 6, 11, ug 12 sa Article II sa RA 9165 (Comprehensive Dangerous Drugs Act of 2002).
Sumala sa PDEA, ang malampusong operasyon nagpakita sa lig-on nga koordinasyon tali sa mga ahensya nga nagpatuman sa balaod batok sa ilegal nga droga, uban sa suporta sa lokal nga panggamhanan ug mga lumolupyo sa komunidad.
Samtang, gipadayag sa PDEA Regional Office 13 nga padayon nilang pakusgon ang intelligence-driven ug inter-agency anti-drug operations sa tibuok Caraga aron mapadayon ang kalinaw ug kahapsay sa mga komunidad.
Photo courtesy: PDEA-13
