Gidasig sa Bangko Sentral ng Pilipinas (BSP) ang mga negosyante sa nasud nga aktibong ipasiugda ang Personal Equity and Retirement Account (PERA) program aron matabangan ang mga empleyado sa pagtipig alang sa ilang kaugmaon samtang makabenepisyo usab ang mga kompanya pinaagi sa tax incentives.
Sumala ni BSP Deputy Governor Lyn Javier, ang pagpalambo sa PERA makatabang sa pagdugang sa employee satisfaction ug retention pinaagi sa mas maayong retirement savings opportunities. Ang PERA usa ka boluntaryong retirement savings program nga nagsuporta sa mga pension system sama sa Social Security System ug Government Service Insurance System.
Ubos sa programa, ang mga private employers nga motugma o mosobra sa kontribusyon sa ilang mga empleyado mahimong makakuha og tax deductions nga moabot sa 150% sa ilang kontribusyon. Ang mga miyembro sa PERA mahimo usab mamuhunan sa stocks, bonds, funds ug uban pang investment products nga exempted sa nagkalain-laing buhis.
Ang locally employed ug self-employed individuals mahimong mo-contribute og hangtod P200,000 matag tuig, samtang ang overseas Filipino Workers kon OFW gitugotan og hangtod P400,000.
Niadtong Abril 2026, ang East West Banking Corporation nahimong unang universal bank nga naglunsad og employer-sponsored PERA program nga adunay boluntaryong enrollment, ug gilauman sa BSP nga mosunod usab ang ubang bangko ug korporasyon sa maong inisyatibo aron mapalapad ang investor base ug mapalig-on ang capital market sa nasud
Photo Courtesy: BSP store
