Natapos na sa Guangzhou Shipyard International ang paghimo sa giingong pinakadakong barko sa kalibutan alang sa pagdala og mga sakyanan sa kadagatan, nga makahimo pagkarga og kapin 10 mil ka sakyanan sa usa ka biyahe.
Ang barko gitawag og Glovis Leader ug gi-komisyon sa Hyundai Motor Company. Kini usa ka Pure Car and Truck Carrier o PCTC nga gidisenyo alang sa transportasyon sa nagkalain-laing klase sa sakyanan sama sa electric vehicles, hydrogen-powered vehicles, ug dagkong trak.
Nasayran nga mas sayo pa nga nahuman ang proyekto kaysa sa orihinal nga iskedyul pinaagi sa Guangzhou Shipyard International ubos sa China State Shipbuilding Corporation ug China Shipbuilding Trading Co. Ltd..
Ang Glovis Leader adunay gitas-on nga 230 metros ug gilapdon nga 40 metros, samtang ang design draft niini maabot og 10.5 metros. Makabiyahe usab kini sa tulin nga 19 knots.
Aduna kini 14 ka espesyal nga vehicle decks nga makahimo pagkarga hangtod sa 10,800 ka mga sakyanan, hinungdan nga kini karon giila isip pinakadakong Pure Car and Truck Carrier nga namugna hangtod sa pagkakaron.
Photo Courtesy: NurPhoto via Getty Images
