Giklaro sa Bukidnon Second Electric Cooperative (BUSECO) nga dili kakulang sa supply sa kuryente ang hinungdan sa pagsigeg kapalong sa sugang-dagitabnon sa Barangay Aglayan ug mga kasikbit nga dapit sa Malaybalay ning bulan sa Mayo 2026.
Gibutyag ni BUSECO Malaybalay Area Engineer Paul Mark Paquibot, nga bastante ang ilang suplay, apan mokalit lang og kawala ang kuryente kung maigo ang mga linya niini sa mga nakadikit nga sanga sa kahoy.
Tungod niini, nagpadayon karon ang gihimong clearing operations sa maong kooperatiba aron daling masulbad ang maong problema sa brownout.
Una nang gikalagot sa mga konsumedor ang sunod-sunod nga Service Alerts ang BUSECO Kasanag mahitungod sa mga unscheduled power interruption nga miigo sa pipila ka bahin sa Malaybalay City, Lantapan, Talakag, ug Cabanglasan. Sumala sa advisory sa kooperatiba, kasagaran sa hinungdan niini mao ang mga depekto sa linya sama sa pagka-trip off sa mga feeder recloser ug mga isyu subay sa 69kV transmission.
Samtang, dili apektado ang serbisyo sa mga personahe sa Barangay Hall sa Aglayan taliwala paman sa sunod-sunod nga kalit nga pagkapalong sa kuryente.
Kini ang gibutyag ni Kagawad Peter John Pepito sa pakighinabi sa Juander Radyo Malaybalay nga nagmontar sila og solar power system sa maong barangay hall aron magpadayon gihapon ang ilang inadlaw-adlaw nga operasyon.
Gihimo sa mga opisyal ang maong lakang gumikan kay ilang nabantayan ang sige-sige ug kalit nga pagkawala sa suplay sa sugang-dagitabnon. Hinuon, giklaro ni Pepito nga kadto lamang mga importante nga transaksyon ang ilang gihatagag prayoridad sa pagkakaron gamit ang solar energy.
Photo Courtesy:BUSECO Kasanag
