Gipahayag sa Department of Energy (DOE) niadtong Lunes nga mius-os og gamay ang imbentaryo sa fuel sa Pilipinas itandi sa miaging semana, apan nagpabilin kini nga stable ug dili angayng kabalak-an, luyo sa nagpadayong kausaban sa merkado sa lana sa tibuok kalibotan.
Sumala ni Energy Secretary Sharon Garin, igo ang kinatibuk-ang stock sa fuel sa nasod nga molungtad hangtod sa 45.33 ka adlaw, base sa kasamtangang konsumo niadtong Mayo 15.
Gibanabana nga anaa sa 78,080.13 ka litro ang average nga adlaw-adlaw nga demand sa fuel sa nasod. Ang average karong semanaha mas ubos itandi sa miaging semana, apan dili kini makatandog nga sitwasyon tungod kay segurado sila sa suplay gikan sa ubang nasod.
Dugang pa niya, bisan og sensitibo gihapon ang presyo sa lana sa kalibotan tungod sa nag-usab-usab nga demand forecasts, geopolitical tensions, ug production adjustments sa mga dagkong exporter, nagpabili gihapon nga lig-on ang international supply chains nga gikuhaan sa suplay sa Pilipinas.
Luyo sa gamay nga pagkunhod sa imbentaryo, gipasalig ni Garin nga hugot nga ginamonitor sa DOE ang suplay ug andam kini nga molihok kon ugaling moubos ang stock sa gitawag nga comfortable levels.
Base sa datos sa DOE, ang kasamtangang supply coverage molungtad og 46.85 ka adlaw sa gasolina, 45 ka adlaw sa diesel, 50.14 ka adlaw sa fuel oil, 152.12 ka adlaw sa kerosene, 30.21 ka adlaw sa liquefied petroleum gas (LPG), ug 59.74 ka adlaw sa jet fuel.
Photo courtesy:PNA
