Patay ang usa ka 21-anyos nga lalaki human maaksidente ang iyang gimanehong motorsiklo batok sa nakaparadang truck sa may Sayre Highway, Purok 5, Barangay Bangcud, Malaybalay City, Bukidnon, alas 3:10 sa kaadlawon niaging Mayo 19, 2026.
Base sa imbestigasyon sa kapulisan, ang biktima nagmaneho sa Yamaha Sporty nga motorsiklo kinsa gikatahong ubos sa impluwensya sa makahubog nga ilimnon ug walay helmet sa dihang mibangga kini sa likod nga bahin sa usa ka Isuzu Forward Wing Van Truck nga nakahunong sa daplin sa dalan tungod sa pag-ilis og ligid.
Gimaneho ang maong truck sa 31-anyos lalaki, taga-Purok-3, Taganito Claver, Surigao Del Norte, dunay Driver’s License kinsa mibutyag nga adunay hustong Early Warning Device o EWD nga gibutang sa lugar atol sa insidente.
Tungod sa kusog nga impact, grabeng naangol ang driver sa motorsiklo ug gidala dayon sa mga responder sa Bukidnon Provincial Medical Center apan gideklarar nga dead on arrival. Samtang luwas ug stable ra ang kahimtang sa iyang back rider nga usa ka babaye nga residente sa Valencia City.
Padayon pa karon ang imbestigasyon sa Malaybalay City Police Station kabahin sa maong insidente.
Nagpahimangno pag-usab ang kapulisan sa publiko nga likayan ang pagmaneho nga hubog ug kanunay magsul-ob og helmet alang sa kaluwasan.
Photo Courtesy: Malaybalay City Police Station
