Gipahibalo sa gobyerno sa Thailand nga pagakunhoran nila ang visa-free stay sa mga turista gikan sa 60 ka adlaw ngadto sa 30 ka adlaw alang sa 93 ka nasud. Matod kang Sihasak Phuangketkaeow, isumite pa sa gabinete ang maong panukala aron opisyal nga mapatuman.
Tumong niini nga mapugngan ang kriminalidad ug ang sayop nga paggamit sa visa privileges. Sugod Hulyo 2024, gitugotan sa Thailand ang 60-day visa-free entry alang sa mga turista gikan sa 93 ka nasud.
Apan karon, hugtan usab sa mga otoridad ang pag-inspeksyon sa nagkalain-laing visa aron maseguro nga legal ug husto ang paggamit niini. Tumong sa lakang nga malikayan ang pag-abuso sa taas nga pagpabilin ug posible nga pag-apil sa ilegal nga kalihokan.
Base sa datos, gikan Enero hangtod Mayo 10, 2026, mikabat sa 12.4 milyon ang foreign tourists nga misulod sa Thailand, mas ubos og 3.43 porsyento kumpara sa miaging tuig.
Photo Courtesy: Asia king travel
