Nakadani og nagkadaiyang reaksiyon online ang sikat nga Japanese all-you-can-eat hot pot restaurant chain nga Shabu-yo human mikatap sa social media ang hulagway sa ilang pork slices nga sobra kanipis hangtod halos transparent na tan-awon.
Gitawag pa gani sa mga netizens nga “stealth pork” ang maong karne tungod sa ka nipis niini. Sa usa ka viral nga post nga nakatigom og kapin tulo ka milyon views, adunay netizen nga nagpasiaw kung translucent na ba ang gigamit nga baboy sa restaurant.
Dunay uban nga mibatikos sa restaurant ug miingon nga kung gusto lamang magtipid, dili na unta kini mag-offer og eat-all-you-can promo. Apan adunay usab mga netizens nga mipabor sa estilo sa paghiwa sa karne ug miingon nga mas daghang slice sa baboy ang mahimong makaon tungod kay nipis kini kaayo.
Tungod sa dako nga atensiyong nadawat online, napugos ang kadumalahan sa Shabu-yo sa pagpagawas og opisyal nga pamahayag aron mangayo og pasaylo sa publiko. Giangkon sa kompanya nga adunay pipila ka mga branch nga nakaserbisyo og karne nga wala makasunod sa ilang standard o original nga patakaran sa pag-andam sa produkto.
Photo Courtesy:MustShareNews
