Nagtaga og dul-an sa P2 bilyon hangtod P3 bilyon nga capital expenditure o capex alang sa tuig 2026 ang Shell Pilipinas Corp. bisan pa sa padayong volatility ug kawalay kasiguruhan sa global oil market.
Sumala ni Reynaldo Abilo, vice president for finance, treasurer ug chief risk officer sa kompanya, ang dakong bahin sa budget igahin alang sa pagpaayo sa import terminal ug uban pang imprastruktura aron masiguro ang episyente nga trading ug supply operations sa kompanya.
Dugang pa niya, ang nahibiling pondo gamiton usab alang sa pagpalapad sa mobility network sa Shell sa nagkadaiyang bahin sa nasud. Matod pa ni Abilo, posible nga mahuman ang tuig nga mas ubos sa target range ang magasto sa kompanya tungod sa ilang pag-optimize sa paggasto batok sa kawalay kasiguruhan sa energy market.
Samtang, nagpabilin gihapong taas ang presyo sa petrolyo sa lokal nga merkado bisan pa sa mga rollback tungod sa padayong tensyon sa Strait of Hormuz, usa ka kritikal nga agianan sa halos 20 porsyento sa global oil ug gas shipments.
Nakasalig usab ang daghang Asian refineries, lakip ang Pilipinas, sa crude oil gikan sa Middle East. Matod usab ni Shell president and CEO Lorelie Osial, nakapokus karon ang kompanya sa pagsiguro sa suplay sa petrolyo samtang nagpadayon sa pagsunod sa balaod ug regulasyon taliwala sa krisis sa enerhiya.
Gisuportahan usab sa Shell ang lakang sa gobyerno nga magbutang og limitasyon sa fuel price increases ug minimum rollback human ideklara ang national energy emergency. Sumala ni Energy Secretary Sharon Garin, gitugotan sa maong deklarasyon ang gobyerno sa pagpatuman og kontrol sa price adjustments aron mapugngan ang pagpangwarta o profiteering.
Photo Courtesy: Youtube/Dutch Docu Channel
