Giakusahan ni Senadora Imee Marcos ang Kamara nga posibleng nagahimo og “political maneuver” sa paglangan sa pagpadala sa articles of impeachment batok kang Vice Presiden Sara Duterte ngadto sa Senado.
Segon sa Senadora, dili makatarunganon ang rason nga daghan matod pang mga dokumento ang gi-andam sa Kamara, ilabi na nga sa miaging impeachment cases dali ra nila kini naipadala sa Senado sa samang adlaw sa impeachment vote.
Giingon usab ni Marcos nga gusto niyang magsugod dayon ug matapos sa hustong panahon ang impeachment proceedings aron makabalik ang gobyerno sa pag-atubang sa mga problema sa katawhan.
Apan gipasabot ni Bicol Saro Rep. Terry Ridon nga lahi ang sitwasyon karon tungod kay mas daghan ug mas lawom ang mga dokumento ug ebidensya nga nakolekta pinaagi sa House Committee on Justice.
Dugang ni Ridon, gisunod usab sa Kamara ang bag-ong guidelines sa Korte Suprema aron maseguro ang hustong proseso alang sa bise presidente.
Gipatin-aw pa ni Ridon nga walay balaod o constitutional requirement nga kinahanglan ipadala dayon sa Senado ang articles of impeachment sa adlaw mismo sa impeachment vote.
Samtang, gikumpirma ni Senador Peter Cayetano nga nadawat na nila ang articles of impeachment batol kang VP Sara Duterte kagabii pa lang taliwala sa nahitabong tensyon sulod sa Senate premises.
Photo Courtesy: Rappler
