Wala pa matino sa mga personahe sa Bureau of Fire Protection (BFP) Pagadian kon pila ka mga occupants ang anaa sa usa ka boarding house nga naugdaw sa may Purok Waling-waling, Jamisola Extension, Barangay Sta. Lucia, Pagadian City, karong buntag, Mayo 14, 2026.
Matod ni SFO4 Ernest Beboso, kamulo pa sa pagpahigayon sa assessment ug imbestigasyon ang kabomberohan gumikan kay bag-o pa lang nadeklara ang hingpit nga pagkapalong sa kalayo nga nilamoy sa tibuok boarding house.
Nasayran nga gipanag-iyahan sa usa ka nagngalang Grace Dumaguit ang maong boarding house nga anaa lang usab sa iyang balay sa atbang nga bahin sa pagkahitabo sa maong pagkasunog.
Unom ka mga Firetrucks ang anaa sa lugar gikan sa PDRRMO , CDRRMO, ug BFP Pagadian aron mutabang sa pagpalong sa kalayo.
Padayon pa ang assessment sa mga otoridad aron masuta kon pila ang gibiling damyos ug unsa usab ang hinungdan sa maong pagkasunog.
Samtang andam usab nga mohatag ug temporaryong shelter ang City Government of Pagadian alang sa mga biktimang nasunugan basi usab sa pamahayag ni CDRRMO Head Engr. Joseph Isaias “Vince” Quipot VI.
