Gitudlo ang kanhi mayor sa Iloilo City nga si Jed Patrick Mabilog isip undersecretary sa Department of the Interior and Local Government (DILG).
Kini sumala ni DILG Secretary Jonvic Remulla, human nanumpa si Mabilog kagahapon isip undersecretary alang sa kaluwasan sa publiko, kinsa mag-focus sa mga reporma sa lokal nga gobyerno.
Giinsistir ni Remulla nga si Mabilog wala mangita og panimalos sa pagbalik sa serbisyo publiko.Mahinumduman nga si Mabilog mibiya sa nasud niadtong 2017 ug nagtago sa Estados Unidos human siya giakusahan ni kanhi Presidente Rodrigo Duterte nga matod pa protektor sa ilegal nga droga.
Ang kanhi mayor mibalik sa Pilipinas niadtong 2024 human misurender sa National Bureau of Investigation (NBI). Niadtong Enero 15, 2025, gihatagan siya og executive clemency ni Presidente Ferdinand Marcos Jr., nga nagbukas sa dalan alang sa iyang pagbalik sa serbisyo publiko.
Mahinumduman nga gihimakak ni Mabilog ang mga pasangil nga siya ang protektor sa namatay nga drug lord nga si Melvin Odicta Sr., kinsa napatay niadtong 2016.
Photo Courtesy: X.COM
