Nakarekord og kapin P31.68 bilyon nga booked ug negotiated sales ang industriya sa seafoods sa Pilipinas atol sa bag-ohay lang nga Seafood Expo Global (SEG) sa Barcelona, Spain, sumala sa Department of Agriculture (DA).
Matod sa DA, kini na ang labing taas nga sales nga natala sa industriya sa seafood sa nasud sa ika-32 nga edisyon sa maong international expo, bisan wala kini naghatag og comparative figures gikan sa nangaging mga tuig.
Gibutyag ni Drusila Esther Bayate nga miabot sa $450.6 milyon o kapin P27.73 bilyon ang booked sales, samtang ang negotiated sales mokabat sa $64.17 milyon o dul-an P3.95 bilyon.
Gipasabot sa mga opisyal sa agrikultura nga dakong tabang ang estratehikong pwesto sa Philippine pavilion sa expo nga maoy nakadani sa daghang international buyers.
Sumala sa ahensya, mga buyer gikan sa kapin 150 ka nasud ang mibisita sa booth sa Pilipinas diin gipakita ang nagkadaiyang high-value seafood products sama sa presko ug processed seafood.
Dugang pa sa DA, base sa inisyal nga feedback nga nadawat sa delegasyon sa Pilipinas, dako ang posibilidad nga mas molapad pa ang partisipasyon sa nasud sa umaabot nga mga seafood expo.
Photo courtesy:istock
