Nidominar ang duha ka koponan nga nagrepresentar sa Batch 2000, batok sa ilang mga kaatbang sa Division A sa Sacred Heart Ateneo Alumni Basketball Athletic Association (SHAABAA) Season 29 nga gipahigayon sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Gipangulohan ni kanhi SHAABAA chairman nga si Afshin Ghassemi ang 2K Core Pacific human mibuto og 37 puntos pinaagi sa 15-of-28 shooting, lakip na ang pito ka tres, alang sa pagpukan sa Batch 2002, 79-60.
Nakatampo usab siya og pito ka rebounds. Dako usab og natabang sila ni Ray Maquilan nga adunay 10 puntos, unom ka rebounds, usa ka assist ug usa ka steal, samtang sila nila Benedict Chua, Dave Ting ug Jun Lim naghiusa og 24 puntos, 12 ka rebounds ug unom ka assists alang sa Core Pacific.
Sa laing duwa, si Hanzel Uy maoy nag-una sa 2K Cares pinaagi sa iyang 23 puntos, tulo ka rebounds ug usa ka assist sa ilang 73-34 nga paglubong sa Magis Medical Services (MMS), nga maoy ilang unang kadaugan sa season.
Sa laing aksyon sa Division A, si Raymond Dennis Tan misumpo og 19 puntos samtang sila ni Wilmer Rodney Ong ug Justin Huang parehong nakarekord og double-double sa dihang gilampaso sa Cebu Landmasters Batch 2003 ang Big Three Pizza, 69-47, aron mapadayon ang ilang malinis nga 2-0 nga rekord.
Nakahakot si Ong og 17 puntos ug 16 ka rebounds, dugang pa ang duha ka assists ug duha ka blocks, samtang si Huang adunay 12 puntos ug 18 ka rebounds.
Photo Courtesy: inquirer.net
