Subay sa labing bag-ong datus gikan sa Bureau of Local Government Finance, ang syudad sa General Santos ug Koronadal nagpabilin nga mga lig-on nga haligi sa ekonomiya sa Mindanao. Sa gipagawas nga listahan sa Top 20 Mindanao Cities with Highest Local Income alang sa tuig 2025, ang duha ka syudad sa rehiyon sa SOCCSKSARGEN nakakuha og dungog tungod sa ilang taas nga locally sourced income. Kini nagpakita sa paspas nga paglambo sa negosyo ug epektibong pagkolekta sa buhis sa maong mga dapit.
Ang General Santos City, nga naila sa tibuok kalibutan isip “Tuna Capital of the Philippines,” mitala og impresibong lokal nga kita nga miabot sa PhP 1.327 Bilyon. Tungod niini, nakuha sa GenSan ang ika-3 nga pwesto sa tibuok Mindanao, diin nalabwan lamang kini sa Davao City ug Cagayan de Oro City. Isip sentro sa komersiyo ug industriya, ang maong kalamposan nagpamatuod nga ang GenSan usa sa mga nag-unang destinasyon sa mga investors sa habagatang bahin sa nasod.
Sa laing bahin, wala usab nagpa-uwahi ang Koronadal City nga mitala og lokal nga kita nga PhP 436 Milyon. Kini nagbutang sa Koronadal sa ika-10 nga pwesto sa maong listahan. Isip Regional Administrative Center sa Soccsksargen, ang Koronadal nagpadayon sa pag-uswag dili lamang sa aspeto sa serbisyo-publiko kondili lakip na sa lokal nga ekonomiya niini. Ang maayong distansya niini ngadto sa GenSan, nga gibanabana nga anaa sa 60 kilometros, makatabang usab sa hiniusang paglambo sa tibuok probinsya sa South Cotabato ug sa kasikbit nga mga lugar.
Photo Courtesy: GenSan Dev
