Opisyal nang giila ang mga bag-ong Queens sa Miss Universe Philippines 2026 human sa Coronation Ball nga gipahigayon sa Parañaque City niadtong nakalabay nga gabie.
Atol sa maong kalihokan, gipahibalo ug gikoronahan ang mga kandidata nga mopresentar sa Pilipinas sa nagkalain-laing internasyonal nga beauty pageant ubos sa brand nga “Miss Philippines.”
Si Allyson Hetland gikoronahan isip Miss Supranational Philippines, samtang si Bella Ysmael mao ang Miss Cosmo Philippines.
Si Jenrose Javier usab ang Miss Eco International Philippines, ug si Apriel Smith ang Miss Charm Philippines.
Lakip usab sa mga giila si Nicole Borromeo isip Miss Worldwide Philippines ug si Marianne Arellano isip Miss Tourism Worldwide Philippines.
Gihatagan usab og espesyal nga titulo ang pipila ka semifinalists, sama nila Catherine Wardle isip Miss Teen Universe Philippines ug Trexy Paris Roxas isip Miss Eco Teen International.
Sumala sa organisasyon, kini ang unang higayon nga gipahigayon ang Coronation Ball aron pormal nga itugyan ang mga korona, imbis sa tradisyonal nga pamaagi human sa main pageant night.
Matod pa, ang Miss Universe Philippines 2026 crown gihatag kang Bea Millan-Windorski sa laing seremonya niadtong Mayo 2 sa Pasay City.
Photo Courtesy: x.com
