Nisaka sa 6.47% sa unang quarter sa 2026 ang produksyon sa gatas diin nagpamatuod kini sa kontribusyon sa industriya sa gatas sa pagpalig-on sa food security.
Kini ang gipadayag sa National Dairy Authority (NDA) subay sa report nga gipagawas sa Philippine Statistics Authority nga misaka ngadto sa 11.79 ka milyon ka litro ang lokal nga produksiyon sa unang quarter sa 2026, diin dul-an 7-porsiyento kini nga mas taas gikan sa 11.07 ka milyon ka litro niadtong 2025.
Sumala pa nga misaka usab ang presyo sa gatas og 6.5% sa constant 2018 prices ug 10.3% sa kasamtangang presyo.
Matod ni NDA Administrator Atty. Marcus Antonius Andaya, resulta kini sa pagsaka sa produksyon sa mga mag-uuma sa gatas ug sa gipakusog nga mga programa sa lebel sa umahan.
Samtang, gilauman usab nga makapalig-on sa breeding base, ang pag-abot sa mga imported nga dairy animals, uban sa pagpalapad sa milk feeding program sa Department of Education (DepEd) ubos sa Sagip Saka Act.
Sa samang taho sa Philippine Statistics Authority (PSA), misaka ang per capital milk consumption gikan sa 17.16 ka litro ngadto sa 19.53 ka litro, samtang ang milk sufficiency level, anaa lamang sa 2.10% niadtong Marso.
Tungod niining maayong kalamboan, target sa NDA ang 53 milyones ka litro sa produksiyon sa gatas ug pagpataas sa sufficiency sa gatas ngadto sa 2.33% sa tibuok 2026.
Photo courtesy:Dairy Global
