Na break ang record ang usa ka beteranang circus performer nga babaye human niya malampusong nakuha ang bag-ong world record alang sa labing bug-at nga metal og gi-alsa gamit lang ang iyang buhok.
Si Diana Elizabeth Batres Hermosillo, kinsa adunay 26 ka tuig nga kasinatian sa entablado, mipakita sa iyang talagsaong kusog didto sa Le Paz Theatre niadtong Pebrero 28. Atubangan sa madasigong pundok sa katawhan, giisa ni Hermosillo ang kinatibuk-ang gibug-aton nga 166.11 lbs (75.35 kg) pinaagi lamang sa iyang mga sinapid nga buhok.
Pinaagi niini nga kalampusan, opisyal nga gihulipan ni Hermosillo ang titulo gikan sa Indian weightlifter nga si Asha Rani. Kahinumduman nga nakuha ni Rani ang maong dungog niadtong Hulyo 2014 didto sa Punjab, India, human siya makaalsa og 122.58 lbs (55.6 kg).
Gibutyag ni Hermosillo nga migahin siya og unom ka bulan nga hugot nga preparasyon aron maagwanta sa iyang bagolbagol, liog, ug likod ang hilabihang presyur sa maong buluhaton.
Gigamit sa performer ang mga weighted plates gikan sa gym nga gikonektar sa usa ka kadena nga asero. Sa adlaw sa pagsulay, iyang gisapid og maayo ang iyang buhok sa duha ka managsamang bahin ug gihiusa kini gamit ang usa ka hair tie ug carabiner aron masiguro ang kalig-on sa pagkupot sa maong bug-at nga butang.
Sulod sa 14 ka segundos, gihawiran ni Hermosillo ang maong karga samtang mapahiyumong naggunit sa iyang kilid, butang nga nakapahingangha ug napahugyaw sa katawhan.
Wala pa matapos ang iyang pasundayag, mibalik pa si Hermosillo sa entablado aron ipakita ang laing abilidad diin iyang gibitay ang iyang tibuok lawas gamit gihapon ang iyang buhok. Tungod sa iyang gipakita nga kalig-on, dili ikalimod nga daghan ang natingala ug buot masayod sa sekreto sa iyang pag-atiman sa buhok human sa maong makapaluya nga hagit.
Photo Courtesy: GUINNESS WORLD RECORD
