Nasakmit sa Meat Inspection Team sa Department of Veterinary Medicine and Fisheries uban sa Cebu City Police Office ang mokabat sa 87 kilos nga lechon baboy atol sa gipahigayon nga “hot meat operation” sa nagkadaiyang barangay sa Dakbayan sa Sugbo.
Sumala sa mga otoridad, tulo ka lechon ang gikumpiska tungod sa paglapas sa City Ordinance 2189 human mapamatud-ang walay Meat Inspection Certificate ug wala usab kini’y registration ug licensing permit.
Lakip sa nasakmit mao ang 15 kilos nga lechon gikan sa usa ka manindahay sa Barangay Apas diin ang baboy giihaw sa Talisay City; 42 kilos gikan usab sa manindahay sa Barangay Apas diin ang baboy giihaw sa Barangay Labogon sa Mandaue City; ug 30 kilos gikan sa Barangay Lahug diin ang baboy giihaw sa Barangay Bonbon, Cebu City.
Giingon sa DVMF nga ang mga nakumpiskang karne ug mga nakalapas, gi-blotter una sa Mabolo Police Station 4 sa wala pa kini gilubong sa Block 27 sa North Reclamation Area o NRA.
Samtang, gipahinumdoman sa DVMF ang tanang meat handlers, butchers, ug lechon dealers nga kinahanglan adunay kompleto nga permit, lisensya, ug Meat Inspection Certificate aron malikayan ang multa ug pagkumpiska sa ilang mga produkto.
Photo courtesy: Cebu City Government-Department of Veterinary Medicine and Fisheries
