Nadakpan sa kapulisan ang usa ka suspek nga giingong responsable sa pagtulis sa usa ka balutan sa 1st Crumb Street niadtong Abril 27, 2026, human kini maaresto sa laing operasyon batok sa illegal nga armas ug eksplosibo.
Giila ang suspetsado nga si Benladin M. Macalaba, 24-anyos, ulitawo ug tricycle driver, residente sa Purok Conte, Barangay Tres de Mayo ning dakbayan.
Nasikop siya alas 2:30 sa kaadlawon karong Mayo 5, 2026, sa Purok Talakitok, Barangay Dawis, atol sa joint operation sa kapulisan ubos sa pagpanguna ni Police Captain June Mar Pasobillo, nga gipailalom sa superbisyon ni PLTCOL Norman L. Yparraguirre, Chief of Police.
Gibase sa report sa usa ka concerned citizen ang operasyon nga nagtudlo nga ang suspek adunay gidalang illegal nga pusil samtang nagmaneho og tricycle nga adunay body number I-4705.
Narekober sa kapulisan gikan sa suspek ang usa ka caliber .38 revolver nga adunay lima ka buhing bala, usa ka hand grenade, sling bag, cellphone, notebook, ug ang iyang tricycle.
Sumala sa kapulisan, ang maong suspek mao usab ang giingong nagtulis sa balutan sa miaging bulan.
Sa pagkakaron, anaa na sa kustodiya sa Digos City Police Station ang suspek ug giandam na ang kaso batok kaniya tungod sa paglapas sa Republic Act 10591 ug Republic Act 9516.
Giawhag sa kapulisan ang publiko nga magpabiling alerto ug padayon nga motabang sa pagreport sa mga kahina-hinalang kalihokan alang sa kaluwasan sa komunidad.
