Gisuportahan sa 21st City Council ning dakbayan sa Cagayan de Oro ang paglakip sa mga PTA President sa elementarya ug sekondarya sa tanang Sangguniang Barangay.
Atol sa regular nga sesyon niadtong Lunes, nagsagop og resolusyon ang konseho nga nag-awhag sa tanang Sangguniang Barangay sa dakbayan nga ilakip ang mga presidente sa Parents and Teachers Association (PTA) isip mga resource persons sa ilang tagsa-tagsa ka komitiba sa edukasyon.
Kini nahitabo human ang Cagayan de Oro Federated Parents and Teachers Association nagpadala og resolusyon ngadto sa komite sa edukasyon, diin gihisgotan ang kritikal nga papel sa aktibong partisipasyon sa mga ginikanan aron mapalig-on ang koordinasyon tali sa lokal nga kagamhanan ug sa tunghaan.
Sa pagkakaron, ang Barangay Education Committee, ang body nga gitahasan sa pagplano, pagpatuman, ug pagmonitor sa mga programa sa edukasyon sa lebel sa barangay, wala pay pormal nga mekanismo aron masiguro ang direktang partisipasyon sa mga lider sa PTA.
Ang paglakip sa mga presidente sa PTA nakit-an nga daling makatubag sa mga mulo o problema sa matag tunghaan ngadto sa mga lokal nga opisyal. Kini moresulta sa mas paspas ug responsive nga pag-atiman sa mga importanteng aspeto sama sa imprastraktura sa tunghaan, mga kagamitan sa pagkat-on, kaluwasan sa mga estudyante, ug ang ilang kinatibuk-ang kaayohan.
Tuod nakahatag sab kinig gamay nga kalibog sa ubang mga konsehal labi pa nga subay sa balaud, dili pwedeng mahimong ex-officio o malakip sa structure sa barangay council ang mga PTA President. Busa pagpasabot ni Konsehal Marlo Tabac nga sila ilakip lamang ngadto sa Barangay Committee on Education.
Photo courtesy: Cagayan de Oro City Council
