Nahulog sa engkwentro ang hot pursuit operation sa pulisya batok sa mga suspek sa carnapping sa Barangay Ladtingan, Pikit, Cotabato, niadtong Martes sa hapon, Mayo 5, 2026.
Sumala sa report, miresponde ang Alert Team sa PNP alas-3:45 sa hapon human nangayo og tabang ang duha ka biktima nga giila sa alyas She, 17-anyos, ug Nene, 19-anyos, parehong estudyante, nga giilogan og motorsiklo nga Honda XR 150 sa tulo ka armadong lalaki.
Dali nga mihimo og aksyon ang mga otoridad ug ilang namatikdan ang mga suspek duol sa lugar sa insidente, apan, giingong gipusil sa mga suspek ang pulisya nga hinungdan sa pinusilay.
Usa sa mga suspek nga nailhang alyas Ben, residente sa Ligawasan SGA, BARMM, ang samaran ug gidala dayon sa ospital aron matambalan.
Narekober usab sa lugar ang usa ka basiyo sa kalibre .45 nga armas, samtang nagpadayon ang imbestigasyon ug manhunt operation batok sa duha pa ka suspek nga nakaikyas padulong sa Ligawasan area.
Gipahugtan na usab sa pulisya ang seguridad sa maong lugar human sa insidente.
Photo Courtesy: The South African
