Target karon sa Department of Labor and Employment (DOLE) Zamboanga del Sur ang pagpaubos sa unemployment rate sa probinsya pinaagi sa padayon nga pagpatuman sa ilang mga programa sa trabaho ug panginabuhian.
Matod ni DOLE Zamboanga del Sur Provincial Director Miraflor Casanes, usa sa objectives sa paglusad ug mga job fair aron mapalambo ang employment rate ug mapaubsan na ang ihap sa mga walay trabaho o ang mga unemployment rate.
Lakip sa gipakusgan sa DOLE ang TUPAD o emergency employment program nga naghatag og temporaryong trabaho sa mga displaced workers, ingon man ang pagpanghatag og livelihood starter kits aron matabangan ang mga benepisyaryo nga magsugod og kaugalingong negosyo.
Segon ni Casanes, dako na ang natabang sa ilang mga programa sa rehiyon, diin milyon-milyong piso nga ayuda ang napagawas ug liboan ka benepisyaryo ang nakaangkon og trabaho ug panginabuhian.
Giingon pa ni Casanes, gilantaw sa ahensya nga dili lang makahatag og temporaryong trabaho, kondili magmugna usab og lig-on ug malungtarong panginabuhian ang mga makapahimulos sa ilang programa.
