Sa usa ka talagsaon nga hitabo sa estado sa Indiana, nagdungan og panibat ang nagkalain-laing mananap gikan sa usa ka farm, hinungdan sa kalit nga kagubot sa kasikbit nga lugar ug karsada. Sumala sa report, mikatap dayon ang mga manok, pabo, itik, gansa, ug mga kanding human sila makagawas sa ilang kulongan.
Dali usab nga mitubag ang Grant County Sheriff’s Office human makadawat og tawag gikan sa mga residente nga nakasaksi sa paglatagaw sa mga mananap. Sa ilang pag-abot, ilang naabtan ang mga hayop nga nagkatag sa dalan, nga nakatampo og peligro sa trapiko ug sa kaugalingong kahimtang sa mga mananap.
Sumala sa body camera footage nga giambit sa social media, makita ang paningkamot sa mga otoridad ug tag-iya sa farm sa pagpasig-uli sa kahimtang. Isa-isa nilang giipon ug gibalik sa koral ang mga mananap hangtod nga napasig-uli ang kahapsay sa lugar.
Gikumpirma sa mga otoridad nga walay mananap nga nawala o napasakitan atol sa insidente, ug wala usab nay nadugang nga disgrasya nga nalambigit sa maong panghitabo.
Bisan og walay grabeng kadaot nga nahitabo, ang insidente nagpakita sa kahinungdanon sa hustong pag-atiman ug pagsiguro sa seguridad sa mga farm, ilabi na sa pagpanalipod sa mga mananap ug sa kaluwasan sa komunidad
Photo Courtesy: Grant County Sheriff’s Office
