Gisuportahan sa ACEN Corp. ang ideya nga mahimong magtinabangay ang renewable energy ug nuclear power aron masiguro ang lig-on ug padayon nga suplay sa kuryente sa nasud.
Matod pa ni ACEN president and CEO Eric Francia, ang renewable energy mahimong maayong “complement” sa nuclear power ilabi na kung matuman ang plano sa Pilipinas nga makagamit niini sa 2032.
Gipasabot ni Francia nga ang renewable energy sama sa solar ug hangin makatabang sa paghatag og kuryente sa panahon sa taas nga panginahanglan sa adlaw ug gabii nga mosuporta sa padayon nga operasyon sa nuclear power.
Bisan pa man, gibutyag sa ACEN nga sa pagkakaron nagpunting gihapon sila sa renewable energy, apan padayon nilang mabantayan ang pag-uswag sa nuclear sector tungod kay makaapekto kini sa ilang long-term nga plano sa negosyo.
Samtang ang nuclear power giila nga lig-on nga “baseload” source o padayon nga suplay sa kuryente, wala kini magpagawas og carbon dioxide o polusyon sa hangin panahon sa power generation, sumala sa datos gikan sa U.S. Energy Information Administration.
Apan bisan og limpyo nga enerhiya, nag-atubang gihapon og hagit ang renewable energy tungod sa pagka “intermittent” niini. pananglitan, ang solar energy magdepende sa kahayag sa adlaw, samtang ang wind energy mag-agad sa kusog sa hangin.
Tungod niini, gitan-aw nga ang kombinasyon sa renewable ug nuclear power mahimong solusyon aron mapalig-on ang enerhiya sa Pilipinas sa umaabot.
Photo Courtesy:Philstar
