Nasikop sa kapulisan ang usa ka babaye nga suspek sa kasong pagtulis sa usa ka STL booth human misukol ang biktima sa insidente nga nahitabo alas 3:30 sa hapon niadtong Mayo 4, 2026 sa Lapu-Lapu Extension, Zone 3 sa syudad.
Giila ang biktima nga si Rey Mark S. Paraiso, 34-anyos, residente sa Purok Kawayan, Zone 1, samtang ang suspek mao si Parida Macalipat Landunan, 40-anyos, byuda ug temporaryong nagpuyo sa maong lugar.
Sumala sa imbestigasyon sa Digos City Police Station, miduol ang suspek sa biktima samtang nagbantay kini sa STL booth ug nagpaka-aron ingnon nga kustomer. Sa ulahi, iyang gipahibalo nga hold-up kini ug nagpakita sa armas.
Tungod sa kahadlok, gitunol sa biktima ang iyang cellphone. Apan sa dihang nasuta nga dulaan lamang ang armas, misukol ang biktima nga miresulta sa komosyon hangtod napukan ang suspek.
Dali nga nangayo og tabang ang biktima nga mitultol sa pagdakop sa suspek. Sa pagkakaron, anaa na sa kustodiya sa Digos City Police Station ang suspek samtang gipadayon ang legal nga proseso batok kaniya. Narekober usab ang toy gun ug ubang ebidensya nga gigamit sa krimen.
Giawhag sa kapulisan ang publiko nga magpabiling alerto ug magreport dayon sa mga kahina-hinalang kalihokan aron mapadayon ang kalinaw ug kahapsay sa komunidad.
