Gipahawa sa Philippine Coast Guard (PCG) ang upat ka barko sa China nga misulod sa teritoryo sa Pilipinas nga walay permiso.
Sumala sa PCG, nagpadala sila og mga aircraft ug barko aron paatrason ang mga Chinese research vessels nga nakasulod sa kadagatan, nga klarong paglapas sa United Nations Convention on the Law of the Sea o UNCLOS.
Lakip sa mga barko nga namatikdan mao ang Xiangyanghong 33 nga may kapasidad sa deep-sea research, seafloor mapping, geophysical exploration nga nakit-an sa Quirino Atoll sa Rizal, Palawan.
Gikumpirma usab ang presensya sa Shi Yan 1 duol sa Itbayat, Batanes, nga adunay kapasidad sa marine science ug hydro-acoustic research.
Anaa usab sa maong lugar ang Jia Geng, usa ka modernong deep-sea research vessel nga adunay advanced sensors ug kahayag sa oceanographic studies.
Gipasabot sa PCG nga ang pagsulod sa maong mga barko nga walay permiso usa ka paglapas sa soberanya sa Pilipinas, busa gilayon silang gipahawa gikan sulod sa maritime territory.
Photo Courtesy: Jay Tarriela
