Gipusil-patay ang usa ka lalaki, sa wala mailhing suspetsado sa may alas 3:15 sa hapon, Mayo 3, 2026 sa Purok 2, Barangay Tiniguangan Dimataling Zamboanga del Sur.
Ang biktima gitago sa alyas nga “Jan” 34-anyos mag-uuma ug residente sa Lala, Lanao del Norte, kinsa nakaangkon og samad pinusilan sa dughan hinungdan sa iyang hinanaling kamatayon.
Base sa inisyal nga imbestigasyon, nag-istorya ang biktima ug ang suspetsado sa dihang kalit lang mikuha og pusil ang suspetsado ug gipusil ang biktima hinungdan sa iyang pagkatumba ug pagkahulog sa kanal.
Ang suspetsado nga gihulagway nga usa ka lalaki nga anaa sa hustong edad nailhan usab nga kasamtangang naka-probation tungod sa paglapas sa Republic Act 9165, kinsa mikalagiw paingon sa kakahoyan sa Sitio Codilog, Barangay Poblacion.
Narekober ang mga awtoridad og usa ka fired cartridge case sa 9mm nga pistola sa dapit sa dapit nahitaboan nga posibleng maoy gigamit sa pagpusil. Ang patay’ng lawas sa biktima gidala sa usa ka punerarya sa Tabina, Zamboanga del Sur.
Samtang ang mga personahe sa Dimataling MPS uban sa 2nd ZSPMFC nagpadayon sa hot pursuit ug follow-up operations aron madakpan ang suspetsado.
Giawhag sa mga awtoridad ang publiko nga magpabiling kalmado ug motabang pinaagi sa paghatag og impormasyon nga makatabang sa imbestigasyon.
