Nakadawat og pasidungog gikan sa Guinness World Records ang usa ka fan sa Marvel Comics human siya nagpatattoo og pinakadaghan nga karakter sa iyang lawas.
Ang 40-anyos nga si Tom Radford gikan sa United Kingdom adunay 63 ka tattoo nga naghulagway sa nagkalain-laing character sa Marvel, nga maoy nakapahimo kaniya nga makabungkag sa daang rekord nga 34 ka tattoo nga gihuptan nila Ryan Logsdon ug Rick Scolamiero.
Sumala sa taho, nagsugod ang koleksyon ni Radford niadtong 2016 pinaagi sa tattoo sa kontrabida nga si Thanos sa iyang tiil, ug misunod ang padayon nga pagpadugang hangtod mikatap na kini sa lain-laing bahin sa iyang lawas.
Gilaraw unta niya nga ibahin ang tema sa iyang lawas ang usa ka tiil para sa mga kontrabida ug ang pikas para sa mga superheroes apan tungod sa kakulang sa espasyo, napuno kini ug miabot sa iyang likod ug uban pang parte sa lawas.
Dugang pa, ang iyang Thanos tattoo gipirmahan sa aktor nga si Josh Brolin, samtang adunay usab siya tattoo nga adunay pirma ni Elizabeth Olsen.
Giingon ni Radford nga gituyo gyud niyang mabungkag ang rekord sa dili pa siya moabot og 40 anyos, ug naglaum pa siya nga makadugang og pirma sa iyang mga tattoo sa umaabot nga San Diego Comic-Con
Photo Courtesy: Guinness World Record
