Epektibo karong adlawa, Mayo 5, ang bag-ong pagsaka sa presyo sa mga produktong petrolyo. Sa nagkalahi nga advisory, miingon ang mga kompanya sa lana nga motaas og ₱2.21 kada litro sa gasolina ug ₱2.66 sa diesel, samtang mokunhod og ₱3.53 kada litro sa kerosene. Ipatuman ang bag-ong presyo unya alas 6 sa buntag.
Matod ni Energy Secretary Sharon Garin, gilauman na ang pagsaka sa presyo sa lana karong semanaha tungod sa pagkunhod sa piso nga niabot sa record low nga ₱61.75 kontra dolyar niadtong miaging semana.
Base sa datos sa Department of Energy, igo pa ang suplay sa lana sa nasod nga molungtad og 53.71 ka adlaw, lakip ang gasolina, diesel, kerosene, jet fuel, fuel oil, ug liquefied petroleum gas (LPG).
Niadtong miaging semana, misaka gamay ang presyo sa gasolina og ₱0.53 kada litro, samtang dako ang gikunhod nga presyo sa diesel ug kerosene nga niabot og ₱12.94 ug ₱15.71 kada litro sumala sa mga oil firms
Photo Courtesy: Department of Energy
