Gipalig-on og mga lakang sa Department of Agriculture (DA) aron maprotektahan ang mga mag-uuma ug mapalig-on ang presyo sa humay sa nasod, human naobserbahan ang pagkunhod sa presyo sa pipila ka rice-producing nga mga probinsya.
Sumala sa DA, samtang 77% na sa national harvest ang nahuman, ang presyo sa basang humay miabot na lang og P16 hangtod P17 kada kilo sa pipila ka lugar sa Nueva Ecija, Pampanga, Isabela, ug Cagayan. Apan gipatin-aw sa ahensya nga dili kini tibuok nasod nga kahimtang, kay nagpabilin nga lig-on ang presyo sa ubang lugar sama sa Palawan nga naa sa ₱23 hangtod ₱24 kada kilo.
Aron matabangan ang mga mag-uuma, gipataas sa National Food Authority (NFA) ang buying price sa uga nga humay hangtod ₱30 kada kilo ug magpadayon sa mas kusog nga pagpalit sa mga lugar nga naapektuhan sa pagkunhod sa presyo.
Gipahibalo usab sa DA ang pagpatuman sa direct purchase order system, diin ang mga mag-uuma makabaligya diretso sa NFA bisan wala pa maani ang ilang produkto. Dugang pa, magpalit usab ang NFA og 150 ka trak aron mapaspasan ang pagkuha ug paghatod sa bugas.
Sa bahin sa importasyon, gikonsiderar sa DA ang paglimit sa gidaghanon sa imported nga bugas matag bulan gikan Hunyo hangtod Agosto aron mabalanse ang suplay ug maprotektahan ang presyo sa umahan.
Matod kang Agriculture Secretary Francisco Tiu Laurel Jr., tumong sa gobyerno nga mabalanse ang interes sa mga mag-uuma ug mga konsyumer ilabina sa panahon sa mga hagit sa klima ug kalibutanong kahimtang.
Photo Courtesy: PNA
