Gidili na sa Korean Air ang pagtransport og mga manok pang-sabong gikan sa Estados Unidos padulong sa Philippines, human sa mga alegasyon nga gigamit ang airline sa ilegal nga pagpadala sa mga manok nga gamiton sa cockfighting.
Sumala sa mga report, usa ka animal welfare group ang miingon nga adunay mga breeder sa US nga nagpadala og mga manok pang-away paingon sa Asia pinaagi sa maong airline. Giingon nga ang pipila ka manok gituyo gyud alang sa mga sabong ug mahimong mahal ang baligya depende sa kalidad niini.
Matod sa Korean Air, ilang gi-suspende ang pagdala sa tanang manok pang-sabong sa mga flights gikan US padulong Pilipinas, ug mipasalig nga sila “komitado sa legal ug luwas nga transport sa mga buhing hayop.”
Ang cockfighting, nga iligal sa daghang nasod, nagpabiling popular sa Pilipinas sa pipila ka lugar, diin dako ang pusta sa matag laban sa manok nga naggamit og metal spurs.
Bisan pa sa mga balaod sa US nga nagdili sa cockfighting, giingon sa mga tigpanalipod sa hayop nga nagpadayon gihapon ang breeding ug transport sa mga fighting birds ngadto sa ubang nasod.
Gipasabot usab sa mga ulat nga bisan gi-regulate na sa miaging tuig ang livestreaming sa sabong, nagpabilin gihapon ang operasyon sa pipila ka bahin tungod sa kalisod sa pagpatuman sa balaod.
Photo Courtesy: Skift
