Nanawagan si Senadora Imee Marcos sa kagamhanan nga ipatuman ang direktang government-to-government (G2G) oil procurement aron maminusan ang epekto sa sige nga pagsaka sa presyo sa lana sa tibuok kalibotan.
Sumala sa senadora, angay nga direktang mopalit ang gobyerno og lana gikan sa mga nasod supplier ug ibaligya kini sa kontrolado nga presyo aron makatabang sa mga drayber, mag-uuma, ug mangingisda nga grabeng naigo sa oil price hikes.
Gisaway ni Marcos ang giingong hinay nga lihok sa administrasyon taliwala sa tensyon sa Estados Unidos ug Iran nga maoy hinungdan sa pagsaka sa presyo sa lana.
Gipangutana usab niya kon ngano nga wala nakig-alayon ang gobyerno sa Russia alang sa mas barato nga lana, samtang ang mga pribadong kumpanya sama sa Petron Corporation nakakuha man og minilyon nga bariles sa Russian crude.
Gihisgotan usab sa senadora ang kasaysayan sa nasod niadtong dekada 1970 diin ang gobyerno direktang niangkat og lana aron matabangan ang katawhan batok sa oil shocks.
Iyang gi-awhag ang Pilipinas nga sundon ang estratehiya sa ubang nasod sa Asya sama sa Indonesia, Vietnam, ug Malaysia nga agresibong nakig-uban sa mga oil-exporting countries aron maseguro ang ilang suplay.
Gisugyot usab niya nga palapdan ang tinubdan sa lana gikan sa mga silingang nasod sama sa Malaysia, Brunei, ug Indonesia kaysa magsalig lamang sa mga middleman o refining hubs.
Photo Courtesy: Rappler
