Gipahigayon sa Department of Agriculture Region IX ang usa ka Livestock Caravan sa Barangay Guituan, Ipil, Zamboanga Sibugay karong adlawa Mayo 5,2026.
Tumong niini matod pa ni DA9 Livestock Focal Person Erwin Salinas nga aron mas mapalapdan ang serbisyo alang sa mga mag-uuma ug livestock raisers sa maong lugar.
Naghatag ang ahensya og nagkalain-laing serbisyo sama sa libreng bakuna sa mga hayop, deworming, veterinary consultation, ug distribusyon sa mga tambal ug bitamina para sa kahimsog sa mga alagang hayop.
Dugang pa, nga kini nga caravan makapalig-on sa produksyon sa livestock sa rehiyon ug mapugngan ang pagkaylap sa mga sakit sama sa rabies ug uban pang animal diseases.
Dako usab ang pasalamat sa mga residente sa barangay tungod sa maayong oportunidad nga ilang nadawat, ilabi na sa mga gagmayng mag-uuma nga nakabenepisyo sa libre nga serbisyo.
Sumala sa Department of Agriculture Region IX, padayon nilang palapdan ang maong inisyatiba aron maabot pa ang daghang komunidad sa rehiyon.
Gidasig usab ang publiko nga suportahan ang mga programa sa gobyerno nga nagpunting sa pagpalambo sa agrikultura ug panginabuhian sa mga mag-uuma.
Photo Courtesy: DA ZAMPEN
