Gisugdan na sa kagamhanan ang pagpalig-on sa Pambansang Pabahay para sa Pilipino (4PH) Program pinaagi sa Executive Order No. 34, Series of 2023. Kini nga kamatuoran gipagawas aron mas mapadali ang pagtukod sa mga barato ug de-kalidad nga balay alang sa mga Pilipino nga wala pa’y kaugalingong pinuy-anan. Tumong sa maong programa nga masulbad ang kakuwang sa balay sa tibuok nasod, lakip na sa Regional Office 12 nga naglangkob sa SOCCSKSARGEN.
Ubos sa bag-ong “Expanded 4PH Program,” gipalapdan ang mga pamaagi sa pagpanag-iya og balay. Kung kaniadto nakatutok lang kini sa “vertical housing” o mga condominium-style nga building, karon gilakip na usab ang “horizontal housing” o mga house-and-lot packages. Kini nga lakang gihimo aron mas mohaom sa panginahanglan sa mga pamilya sa urban ug provincial areas, ug aron mas daghan ang makapahimulos sa maong programa.
Dugang pa niini, gipalapdan usab ang listahan sa mga mahimong benepisyaryo sa programa. Lakip na karon sa mahimong mo-apply ang mga Overseas Filipino Workers (OFWs), mga miyembro sa 4Ps nga “graduated” na o self-sufficient, ang working class, ug ang mga informal settler families nga adunay kapasidad sa pagbayad. Kini nagpakita nga ang gobyerno seryoso sa pagtabang sa nagkalain-laing sektor sa katilingban aron makabaton og desente nga puy-anan.
Usa sa mga dagkong bentaha sa Expanded 4PH Program mao ang mas mubo nga interest rate sa pautang. Kung ang kasamtangang industry rate anaa sa 6.25% ubos sa 4PH Program, mahimo kining moubos ngadto sa 3%matag tuig. Gawas sa interest rate subsidy, aduna usab “non-interest subsidy” ang gobyerno para sa mga bayronon sama sa monthly dues ug insurance sa housing unit alang sa mga kwalipikadong benepisyaryo. Pinaagi niini, mas mapagaan ang palas-anon sa mga pamilyang Pilipino sa ilang pagpaningkamot nga makapanag-iya og kaugalingong balay.
Photo Courtesy: DHSUD
