Moabot sa 91,225 ka indibidwal o 26,654 ka pamilya ang naapektuhan sa pag-ulan og abo gikan sa Bulkang Mayon sa probinsya sa Albay.
Sumala ni Guinobatan Mayor Ann Gemma Ongjoco, moabot sa 41 ka mga barangay ang natabunan sa mabaga nga abo, samtang tulo lamang ka barangay ang wala kaayo maigo sa maong kalamidad. Bisan pa man sa maong kahimtang, wala’y gipatuman nga mandatory evacuation sa mga residente sa pagkakaron.
Tungod sa kabaga sa abo, nakasinati og hapit “zero visibility” sa mga nag-unang dalan, hinungdan nga nagpadala og mga fire truck gikan sa nagkalain-laing lungsod aron daling malimpyohan ang agianan.
Naghatag usab ang kagamhanan og fuel assistance pinaagi sa Office of Civil Defense aron mapaspasan ang clearing operations. Gawas sa epekto sa trapiko, naapektohan usab ang suplay sa tubig sa pipila ka dapit human gi-prayoridad ang paggamit niini alang sa paglimpyo sa mga dalan.
Photo Courtesy: Pilipino Mirror
