Patay ang duha ka mga indibidwal samtang usa ang na-angol sa natala nga disgrasya sa may National Highway sa Purok Crossing, Barangay Poblacion, Kumalarang, Zamboanga del Sur, mga alas 5:43 kaganinang buntag, Mayo 5, 2026.
Base sa inisyal nga imbestigasyon, aksidente nga nagkabangga ang usa ka wing van truck ug usa ka motorsiklo nga Kawasaki Barako nga miresulta sa pagkabangil sa usa ka biktima sa ligid sa truck.
Napurohan ang driver sa motorsiklo nga 22-anyos nga lalaking taga Lison Valley, lakip ang 20- anyos nga babayeng angkas nga susamang gideklarang patay diha mismo sa lugar nahitabuan.
Samtang ang laing 17-anyos nga babayeng angkas nakaangkon usab ug mga samad ug bun-og sa lawas nga dali usab gidala sa pinakaduol nga hospital aron kini matambalan.
Dali usab nga miresponde ang mga kapulisan sa Kumalarang Municipal Police Station aron matino ang hinungdan sa maong panghitabo.
Samtang ang driver sa wing van nga 29-anyos nga taga Cagayan de Oro City nakakustudiya na sa buhatan sa kapulisan aron papanubagon sa iyang salaod.
Photo Courtesy: ZSPPO- PRO-9
