Nitala og kapin sa ₱1 trilyon nga utang ang nasudnong kagamhanan sa unang quarter pa lang sa 2026, usa ka lakang nga nagpakita sa pagsalig sa lokal nga pundo taliwala sa walay kaseguruhan sa tibuok kalibutan.
Base sa datos gikan sa Bureau of the Treasury, ang kinatibuk-ang utang sa gobyerno nisaka og 34.69 porsyento ngadto sa ₱1.003 trilyon, itandi sa ₱745.142 bilyon sa susamang panahon sa miaging tuig. Matod ni Jonathan A. Ravelas, senior adviser sa Reyes Tacandong & Co., kini nga pagsaka dili mabalaka tungod kay bahin kini sa “front-loading” o ang sayo nga pagpangandam og pundo aron malikayan ang risgo sa pagbayad sa utang sa ulahing bahin sa tuig.
Ang kinabag-an sa maong utang, nga mikabat sa ₱731.101 bilyon, gikan sa sulod sa nasud (domestic borrowings). Nisaka kini og 62.17 porsyento tungod sa mga dagkong bond issuance, lakip na ang ₱297.94 bilyon nga nakuha gikan sa 10-year fixed-rate Treasury notes niadtong Pebrero. Sa pikas bahin, ang utang gikan sa gawas sa nasud (external borrowings) miusos og 7.40 porsyento ngadto sa ₱272.560 bilyon, bisan pa man sa pagbaligya og US dollar bonds niadtong Enero.
Alang sa tibuok tuig 2026, target sa gobyerno nga mangutang og kinatibuk-ang ₱2.682 trilyon aron pondohan ang mga proyekto ug ang deficit sa budget. Sundon sa administrasyon ang 77:33 nga “financing mix,” diin mas dako ang kuhaon gikan sa lokal nga merkado aron maminusan ang epekto sa pag-usab-usab sa kantidad sa dolyar. Sa pagkakaron, ang kinatibuk-ang utang sa Pilipinas niabot na sa bag-ong record high nga ₱18.159 trilyon hangtod sa katapusan sa Pebrero 2026.
Photo Courtesy: Philippine Revolution Web Central
