Nagpabilin nga seryosong hulga sa kahimsog sa publiko ang presensya sa mga asong gala sa Iligan City, hinungdan nga mipahimangno ang City Veterinary Office sa katawhan nga magpabiling alerto ug responsable sa ilang mga binuhi.
Sumala kang Philippe L. Pirante, Administrative Officer I sa City Veterinary Office, nagpadayon ang ilang buhatan sa pagpatuman sa mga lakang sama sa meat inspection ug livestock monitoring aron masiguro ang kaluwasan sa pagkaon ug kahimsog sa komunidad. Apan, giila niini nga usa sa pinakadakong hagit karon mao ang pagdumala sa mga stray dogs.
Matod ni Pirante, ang dog pound personnel nag-atubang og lisod ug delikadong trabaho matag adlaw.
Gidugang pa nga adunay mga insidente nga ginakontra o ginapugngan ang ilang mga personnel sa dihang mangdakop og mga iro nga galatagaw, nga nagdugang sa kapeligrohan sa ilang trabaho.
Gipasidaan usab sa buhatan nga ang rabies usa ka makamatay nga sakit kon dili matambalan dayon, ug mahimong magbutang sa kinabuhi sa bisan kinsa sa dakong peligro kon mapaakan sa irong walay bakuna.
Busa, hugot nga panawagan sa City Veterinary Office sa publiko nga motuman sa mga regulasyon sa maong buhatan, lakip ang responsableng pag-atiman sa mga binuhi, pagpabakuna batok sa rabies, ug paglikay nga pasagdan lang nga maglibod-libod ang ilang mga iro sa kadalanan.
Gilauman sa lokal nga kagamhanan nga pinaagi sa kooperasyon sa katawhan, mapugngan ang posibleng paglala sa rabies ug mapanalipdan ang kahimsog ug kaluwasan sa tanang residente sa syudad.
Photo Courtesy: City Veterinary Office
