Patay ang usa ka lalaki human kini nabanggaan ug sakyanan didto sa Sitio Talisay, Barangay Suawan, Marilog District, Davao City, pasado alas 7:00 sa milabay nga gabii.
Sumala sa report, ang biktima giila nga si Martin Bangunan, minyo, kinsa giingong mitabok sa Davao-Bukidnon road ug kalit nga nabanggaan sa usa ka SUV. Tungod niini, nakaangkon ug seryusong samad bun-og sa lawas ang biktima ug dayong gidala sa pinakaduol nga balay tambalanan alang sa medikal nga pag-atiman, apan gideklara kining dead on arrival.
Samtang gibutyag sa mga residente sa maong lugar nga ngitngit ang maong bahin sa dalan tungod kay dili mosiga ang mga suga sa poste, hinungdan nga wala mabantayi sa driver ang biktima nga mitabok.
Sa pagkakaron padayon ang imbestigasyon sa mga otoridad ug gipahimangnoan ang publiko nga mag-amping ilabina sa pagtabok sa kadalanan.
