Gilusad sa lokal nga panggamhanan sa Mabini Davao De Oro, pinaagi sa Municipal Health Office (MHO), ang Bakuna Eskwela: School-Based Immunization 2026 aron mapanalipdan ang kahimsog sa mga kabataan nga nag-eskwela.
Gipangunahan ni Mayor Emerson Luego ang kick-off ceremony nga nagtumong sa pagpalapad sa kahibalo sa mga ginikanan, magtutudlo ug eskwelahan kabahin sa kamahinungdanon sa pagbakuna batok sa mga sakit nga malikayan pinaagi niini.
Gipasiugda usab sa kalihokan ang kooperasyon sa lokal nga panggamhanan, mga health worker, magtutudlo ug ginikanan aron masiguro nga mahatagan og gikinahanglang serbisyo panglawas ang mga bata.
Pinaagi sa maong programa, gipadayon sa LGU Mabini ang mga lakang sa pagpalig-on sa preventive healthcare ug pagpanalipod sa kahimsog sa mga estudyante alang sa ilang maayong pagtubo ug kaugmaon.
