Gipahigayon sa lokal nga panggamhanan sa Dakbayan sa Maasin, pinaagi sa City Human Resource Management and Development Office (CHR MDO), ang usa ka kalihokan alang sa pagpalambo sa kahibalo ug kahanas sa mga trabahante, isip kabahin sa pagsaulog sa LGU Month 2026.
Mitambong niini ang mga permanente ug casual nga empleyado, lakip ang mga napiling opisyal sa LGU, diin gilakip sa kalihokan ang refresher orientation bahin sa mga benepisyo sa iCare Health Maintenance Organization (HMO) ug diskusyon sa Public Ethics and Social Media Accountability.
Tumong sa kalihokan nga mapahinumdoman ang mga partisipante sa ilang mga benepisyo sa panglawas, samtang palig-onon ang ilang pagsabot sa hustong pamatasan, responsableng paggamit sa social media ug pagkamay-tulubagon isip mga sulogoon sa publiko. Si Dr. Shefferd Bib S. Bernales ang nagsilbing resource speaker sa sesyon bahin sa etika sa publikong serbisyo ug pagkamay-tulubagon sa social media, diin iyang gipasiugda ang kamahinungdanon sa propesyonalismo, integridad ug responsableng komunikasyon aron mapadayon ang pagsalig sa katawhan.
Kabahin kini sa padayong Learning and Development Program sa lokal nga panggamhanan sa dakbayan sa Maasin nga nagtumong sa paghatag sa mga opisyal ug empleyado sa gikinahanglang kahibalo sa mga responsibilidad ug maayong pamatasan aron masiguro ang epektibo, responsable ug serbisyo publiko nga nakasentro sa panginahanglan sa katawhan.
Photo courtesy: City Government of Maasin
