Nagpadayon ang mga Member States sa World Health Organization (WHO) sa pag-usad sa trabaho alang sa Pathogen Access and Benefit Sharing (PABS) annex, nga kabahin sa WHO Pandemic Agreement.
Didto sa Geneva, natapos ang resumed session sa ikaunom nga tigum sa Intergovernmental Working Group (IGWG) nga nagtutok sa PABS system. Ang resulta niini nga panag-istoryahanay ipresentar sa Seventy-ninth World Health Assembly (WHA) karong bulana.
Tungod kay gikinahanglan pa ang dugang nga negosasyon, hisgotan sa WHA ang pagpadayon sa trabaho sa IGWG subay sa Resolution WHA78.1.
Matud ni WHO Director-General Dr. Tedros Ghebreyesus, adunay “tinuod nga pag-uswag” (real progress) nga nahimo ug gilauman nga masulbad ang mga dili pagsinabtanay pinaagi sa padayon nga negosasyon.
Tumong sa PABS system ang patas nga pagbahinay sa mga pathogens (kagaw) ug mga benepisyo sama sa mga bakuna (vaccines), diagnostics, ug therapeutics. Gilauman nga magpadayon ang IGWG sa ilang ikapito nga tigum sugod sa Hulyo 6 hangtod 17, 2026.
Photo courtesy: Al Jazeera
