Niabot na sa 52-ka barangay ang apektado sa ashfall o pag-uwan og abo tungod sa padayong pagsaka sa aktibidad sa Bulkang Mayon, sumala sa Office of Civil Defense, adlawng sabado. Base sa taho sa Philippine Institute of Volcanology and Seismology o PHIVOLCS, sunod-sunod nga volcanic activity ang nagpahinabo sa mabaga nga abo nga mitabon sa nagkalain-laing bahin sa Albay.
Bandang alas-4:28 sa hapon, nahitabo ang usa ka lava collapse sa tumoy sa bulkan nga nagmugna og pyroclastic density currents partikular na sa Mi-isi Gully sa habagatan-kasadpang bahin. Gibanabana nga miabot sa 4 ka kilometro ang gitas-on sa gipagawas nga PDCs, nga giisip nga kinadak-an sukad sa kataposang pagbuto sa Mayon.
Matod ni PHIVOLCS Director Dr. Teresito Bacolcol, nagpabilin sa Alert Level 3 ang bulkan, nga nagpasabot sa magmatic unrest ug ang posibilidad sa mas delikado nga pagbuto, busa hugot nga gidili ang pagsulod sa 6 km Permanent Danger Zone.
Gipahimangnoan ang mga residente nga magpabilin sa sulod sa balay kon adunay ashfall, mogamit og protective masks, ug siguraduhon nga tinakpan ang pagkaon ug tubig aron malikayan ang kontaminasyon.
Sa pagkakaron, nagpadayon ang koordinasyon sa OCD, PHIVOLCS, ug lokal nga kagamhanan aron maseguro ang kaluwasan sa mga lumulupyo. Ang mga barangay nga apektado sa ashfall nahimutang sa mga lungsod sa Camalig, Guinobatan, Daraga, ug Legazpi City, diin naka-standby na ang mga volunteers ug disaster response teams alang sa dinaliang tabang.
Photo courtesy: x.com
